Thursday, 12 January 2017

தை மௌனி அமாவாஸ்யை -27.1.17



மேற்கண்ட நாள் தை அமாவாஸ்யை மட்டுமல்ல, அனைவரும் அமைதியாக மௌன விரதம் கடைபிடிக்க வேண்டிய 'மௌனி அமாவாஸ்யை' ஆகும். இந்நாளில் அனைவரும் ஒரு வார்த்தை கூட பேசாமல் மௌன விரதத்தை கடைபிடிக்க வேண்டுமென நம் புராதன கிரந்தங்கள் கூறுகின்றன. இந்த மௌன விரதம் வரும் ஆண்டு முழுதும், நமக்கு பிறரிடம் சண்டை சச்சரவுகள் இல்லாமலும், தெளிவான முடிவுகள் எடுக்கவும் உதவும். அதிகாலையில் எழுந்து முடிந்தோர் கடல் ஸ்நானம் அல்லது புனித ஆற்றில் ஸ்நானம் செய்து, (இவ்விரண்டும் முடியாதோர் குளிக்கும் நீரில் 'ஹிமாலயன் ராக் சால்ட்' இட்டு குளிக்கவும்) பித்ருக்களுக்கு ஆற்ற வேண்டிய கடமைகளை செய்து, காக்கை மற்றும் பசுவிற்கு உணவிட்டு அமைதியாக மறு நாள் காலை ஆறு மணி வரை, பகவான் கிருஷ்ணரின் நாமத்தையோ அல்லது மகா காளியையோ நினைத்து அமைதியை கடைபிடித்து நம் மனதின் ஓட்டங்களை கவனித்து வரலாம். வருடத்தில் ஒரு முறை வரும் அருமையான நாள் இது. இந்த மௌன விரதத்தின் முக்கியத்துவமே, நம் வாழ்வின் துன்பங்களை கலைவதற்காகும். எனவே, மௌன விரதம் மேற்கொள்வோர், இணையத்தில் நேரத்தை செலவிட்டும்
, தொலைக்காட்சியில் செலவிட்டும் வீணாக்க வேண்டாம்.

மௌனத்தை கடைபிடித்து நம்மை அறியும், தெய்வீக நிலைக்கு அழைத்து செல்லும் ஒரு சுலப மூச்சு பயிற்சி முறையை விரைவில் வீடியோவாக பதிய இருக்கிறோம்.

ஹரி ஓம் தத் சத் :

Tuesday, 10 January 2017

அனைத்து ஐஸ்வர்யங்களையும் அளிக்கும் பவுர்ணமி ஆருத்ரா தரிசனம் 11.1.17

இன்றைய புனித நாளில் சிவ சன்னிதானம் சென்று அங்குள்ள நடராஜர் சந்நிதியின் கர்ப கிரக விளக்கிற்கு தூய நெய் கொடுத்து, சிவபெருமானுக்கு வில்வ இலை மாலை சூட்டி வணங்கி வர, ஈசனின் பரிபூர்ண அருள் கிட்டும். மேலும், இன்றைய  தினம் இரவில் அமைதியாக குறைந்தது பதினைந்து நிமிடங்கள் நிலவு தரிசனம் செய்ய, மனோபலம் கூடும். நிலவு தரிசனம் செய்யும் சமயம் கீழ்கண்ட மந்திரம் மனதினுள் கூறி வருவது மிக நன்று. இந்நாளில் வீட்டில் ஈசனின் முன் தனி நெய் தீபம் ஏற்றி வைத்து, பச்சரிசியும் வெல்லமும் கலந்து செய்யும் களியை நிவேதனம் செய்து வர நற்பலன்கள் கூடும். பரிகாரத்திற்காக ருத்ராட்சங்கள் அணிய விரும்புவோர் இந்நாளில் அணிவது கூடுதல் சிறப்பு.

மந்திரம் : நடராஜா நடராஜா ஜெய் சிவ சங்கர நடராஜா
                    சிவராஜா சிவராஜா சம்போ சங்கர சிவராஜா  


ஹரி ஓம் தத் சத் :

Sunday, 8 January 2017

துவாதசியில் அன்னமிடுங்கள் அனைத்தையும் பெறுங்கள் 9.1.17



மேற்கண்ட திதி இன்று 9.1.17 திங்கள் கிழமை ஆகும். குறிப்பாக மார்கழி வளர்பிறை துவாதசியில் வறியோர்க்கு அன்னமிடுவது, பல மடங்கு நன்மைகளை சேர்க்கும். இன்று சிலருக்கு இடும் அன்னம் பல லட்சம் பேருக்கு இடும் அன்னதானத்திற்கு சமமாகும்.

முறை :

காலை பல் துலக்கி, முதலாவதாக காக்கைக்கு ஏதேனும் உணவிட்டு, பின் நீரோ அல்லது தேநீர் போன்றவை அருந்தலாம். காலை சிற்றுண்டி முடிந்ததும், ஏதேனும் உணவை நாய்களுக்கு, இலையிலோ அல்லது பேப்பரிலோ வைத்து, பின் முடிந்தால் பசுவிற்கு வாழைப்பழம் அல்லது உங்கள் சக்திக்கேற்ற உணவை கொடுத்து, பின் மதியம் உங்களால் முடிந்த அளவு நபர்களுக்கு தயிர் சாதம் அல்லது வேறு உணவுகளை கொடுத்து வரவும். அன்னதானம் இடும் சமயம் பறவைகளாயினும், மிருகங்களாயினும், மனிதர்களாயினும் சரி, அன்னமிடுவோர் கால்களில் செருப்பு அணிந்து இருக்க கூடாது என்பதை நினைவில் கொள்க. அன்னதானம் இடும் நாட்களில், பலனை பெற, அசைவம்-முட்டை உட்பட தவிர்க்கவும்.

இப்பதிவை தாமதமாக படிப்போர், இரவில் நாய்களுக்கும், முடிந்த அளவு மனிதர்களுக்கும் உணவிட்டு வரவும்.

ஹரி ஓம் தத் சத் :